دێبكا: نوونەرێن ئەمریكا وئێران وێ بجڤن

آرك نيوز...مالپەرەكە ئیسرائیلی دبێژە كو نوونەرێن ئەمریكا ونوونەرێن ئێرانێ گەهشتنە وەلاتێ قەرتەر وعێراقێ , داكو جڤینەكێ ئەنجام بدن وب گهنە رێكەفتنێ , وناكۆكیان ناڤبەرا خوە دە كێم بكن .

مالپەرا دێبكا یا ئسرائیلی ئەشكەرەكر كو هەردو وەلاتێن قەتەر وعێراقێ مێڤانداریا نوونەر وشاندەیێن هەر یەك ژ ئەمریكا وئێرانێ كرنە , داكو دەست ب دانوستاندن وگۆتووبێژیان بكن , ودئەنجامێ دە بگهنە رێكەفتنەكێ كو هەردو ئالی پێ رازی بن .

وەكە مالپەرا ئیسرائیلی بەلاڤكریە پەیوەندیێن نهێنی ناڤبەرا ئێران وئەمریكا دە , تو ئاماژەیێ ب كێمكرنا ئاستێ ناكۆكیێن لەشكەری نادە , ئەوژی د دەمەكێ دە كو دۆنالد ترامپ سەرۆكێ ئەمریكا راگەهاندبوو كو ئەمریكا ناخوازە ل گەل ئێرانێ شەر بكە ,وئەگەر ئێران شەر بخوازە , ئەو شەر وێ ببە داویا ئێرانێ .

هەروەها مالپەرا ناڤبووری گۆت كو رێبەرێ بلندێ ئێرانێ ژی هەمان لێدوانا دۆنالد ترامپ دایە وگۆتیە كو ئەو ناخوازن شەر ل گەل ئەمریكا بكن , وئەگەر شەر دروست ببە گەلێ ئێرانێ وێ بەرەڤانیێ بكە , ودانوستاندن ل گەل ئەمریكا د دەما نهادە وەكە ژەحرێنە .

بەریا دەمەكێ ئەمریكا راگەهاندن كو زانیاری گەهشتنە دەستێ وان كو ئێران ل عێراق وسووریێ وێ ئێریشی هێزێن ئەمریكی بكە , وكارڤەدانا ئەمریكا ئەو بوو كو كەشتێن جەنگی ل كەنداڤا عەرەبی ب جه كرن , وپاتریك شاناهان وەزیرێ بەەرڤانیا ئەمریكا ب وەكالەت دبێژە كو وان كاریە رێگریێ ل ئێریشێن ئێرانێ بۆ سەر هێزێن ئەمریكی بكن .

ئێران كو دەستێوەردانێ ل ناڤچەیێ دكە , وەكە ئەمریكا دبێژە ئێران سەدەما نە بەرقەراربوونا ئەولەهیێ یە ل دەڤەرێ , وئەمریكا دخوازە هەژموونا ئێرانێ ل ناڤچەیێ نەهێلە .

وژئالیێ خوەڤە محمد صالح قادری بەرپرسیارێ پەیوەندیێن دەرڤە یێن حزبا دیموكراتا كوردستان ایران ژ ئاركێ راگەهاندبوو كو د دەما نهادە رژێما ئێرانێ د سەخترین قۆناغ دە درباس دبە , ژ بەر ئیدی رژێما ئێرانێ نەما كارێ رێڤەبەریا ئێرانێ بكە و ب تایبەتی پشتی رێگری ل فرۆستنا نەفتا ئێرانێ هاتیە كرن , ژ بەر ئابووریا ئێرانێ 70 % پشتەڤانیێ ب داهاتێن نەفتێ گرێ ددە .
ز.ح

436